Welcome to Athanur Aura

நாமக்கல் மாவட்டம், இராசிபுரம் வட்டம், அத்தனூர் கிராமம் — மங்கள நகரமாம் சேலத்திலிருந்து நாமக்கல் செல்லும் தேசிய நெடுஞ்சாலையில் 16 கி.மீ தொலைவில் கிழக்கே போதி மலை, கள்ளார்மலை, மேற்கே சிந்தாமணி மலை, வடக்கே சஞ்சீவிராயன் மலை, தெற்கே அலவாய்மலை என்னும் சிவன் மலை இதனை உள்ளடக்கிய கொங்கு மண்டலத்தில் எழில்மிகு சித்தர்மலைச் சாரலில் அருள்மிகு ஸ்ரீ அத்தனூர் அம்மன் திருக்கோவில் அமைந்துள்ளது.

• 1) அருள்மிகு ஆதீஸ்வரர் திருக்கோயில் — அருள்மிகு ஸ்ரீ அத்தனூர் அம்மன் கோவில் வளாகத்திலேயே அமைந்துள்ளது.
• 2) அருள்மிகு சஞ்சீவிராய பெருமாள் திருக்கோயில் — திருக்கோவிலின் அருகாமையில் உள்ள எழில்மிகு மஞ்சக்கல் மலைமீது அமைந்துள்ளது.

சங்க காலத்தில் கொல்லிமலைப் பகுதியை ஆண்ட, கடை ஏழு வள்ளல்களில் ஒருவராகத் திகழ்ந்த, வல்வில் ஓரி மன்னன் வழிபட்ட புண்ணிய ஸ்தலம் ஆகும். இக்கோவில் ஒரு முக்கியமான பிரார்த்தனை ஸ்தலமாகும்.

கருவறையில் அருள்மிகு அத்தனூர் அம்மன் வடக்கு முகமாக வீற்றிருக்கிறாள். அர்த்த மண்டபத்தில் அம்மனின் பூஜைப்பொருட்கள் வைக்கப்படும். அர்த்த மண்டபத்தின் தென்கிழக்கு மூலையில் விநாயகரும், மேற்குபுறம் உற்சவமூர்த்தியும் வைக்கப்பட்டுள்ளது. நுழைவாயிலின் இருபுறமும் கம்பீரமான துவார பாலகர் மற்றும் துவார பாலகி அமைந்துள்ளார்கள்.

மகாமண்டபத்தில் அம்மனின் எதிர்ப்புறம் காளை வாகனம், பாதம் கொண்ட தூரிக்கல், கொடி மரம், பலிபீடம் மற்றும் பாச்சலான், செம்பராயன், துலக்கண்ணன், ஆலத்தூரான் என்ற 4 வகையான கல்குதிரைகளும், பிரமாண்டமான கல்நந்தியும் கல் குதிரையும் அமைந்துள்ளன.

கருவறை பின்புறம் ஆதிமூலவர் சன்னதி (வடக்கு), கன்னிமார் சன்னதி, முன்னோர்கள் சன்னதி, தென்மேற்கில் ஊருதி விநாயகர் கோவில் (கிழக்கு), மேற்கில் ஸ்ரீ சர்வேஸ்வரர் சுவாமி சன்னதி, தென்கிழக்கில் மடப்பள்ளி, வடகிழக்கில் நவகிரகங்கள் அமைந்துள்ளன.

ராஜகோபுர நுழைவாயில் எதிர்புறம் அத்தாயி சன்னதி (வடக்கு), வடமேற்கில் உரும்பிக்காரன் சன்னதி, முத்து முனியப்பன் கோவில், மகாமுனி & ராஜமுனி சன்னதிகள் அமைந்துள்ளன.

உபசன்னதி முத்து முனியப்பனை வேல், விலங்கு கொண்டு வழிபட்டால் பில்லி, சூனியம், காத்து, கருப்பு விலகி விடும்.

பாதிக்கப்பட்டவர் கிழக்கு வாசலில் நுழைந்து அம்மன் பாதம் வைக்கப்பட்ட தூரியை ஆட்டி வடக்கு வாசலில் வந்தால் நியாயம் கிடைக்கும் என்பது மறுக்க முடியாத உண்மை.

இக்கோவிலை நிர்வாகம் செய்ய ஐந்து தர்மகர்த்தாக்கள் நியமிக்கப்படுகிறார்கள்:

• 1) செங்குந்த முதலியார் சமூகம் — 1 தர்மகர்த்தா
• 2) விழியன்குல நாட்டு கவுண்டர்கள் — 1 தர்மகர்த்தா
• 3) எட்டுபட்டி கிராம வெள்ளாள கவுண்டர்கள் — 2 தர்மகர்த்தாக்கள்
• 4) பிற சமூகத்தினர் — 1 தர்மகர்த்தா

அம்மன் சன்னதிக்குள் உயிர் பலிகள் கிடையாது. முத்து முனியப்பன், ராஜமுனி, மகா முனிக்கு மட்டுமே அசைவ பூஜைகள் நடைபெறும்.

கிழக்கு வாசலில் நுழைந்து அம்மனை வழிபட்டு வடக்கு வாசலில் வெளியே வந்து அத்தாயி அம்மனை வணங்குவது வழக்கம்.

தேர்திருவிழா கொடி ஏற்றத்துக்கு சேலை கொடுப்பது, தேருக்கு சேலை கொடுப்பது, உற்சவ மூர்த்தியை தூக்கி வருவது அத்தனூர் செங்குந்த முதலியார்களின் பரம்பரை உரிமை.

தேர் உலாவந்த பின் இரு தட்டுகளில் தீபாராதனை காட்டப்பட்டு, ஒரு தட்டு பிரசாதம் உள்ளூர் வெள்ளாளக் கவுண்டர்களுக்கும், மற்றொரு தட்டு விழியன்குல நாட்டுக் கவுண்டர்களுக்கும் வழங்கப்படுகிறது. அருந்ததியர்கள் கிழக்கு வாசலுக்கும், ஆதிதிராவிடர்கள் வடக்கு வாசலுக்கும் பந்தல் போடுவதும், மண்டடையார்கள் கிராமசாந்தி செய்வதும், தேர் ஆசாரிகள் தேர் ஓட்டுவதும் தொன்றுதொட்டு நடைபெறும் வழக்கமாகும்.